اصول الزرع ..
🌿🌿🌿🌿🌿🌿🌿🌿🌿
الشجره لمن تسقيها
بتخّضر بتعطيك زهور
الورده لوما بترويها
ما بتفح عليك عطور
ارضك بدّك تكفيها
شتل مأصل اما بذور
ان اهملتها بتلاقيها
حفرا نفرا صارت بور
ولادك متل الزرع تربيها
وتتعب معها سنين شهور
صفحة بيضا عبيها
شفافه متل البلور
سقيها حب وغذيها
عززها اخلاق ونور
ثقفها وعلم اعطيها
مش كافي مال وميسور
تحت جناحك دفيها
ل طّير متل العصفور
ارياح ان عصفت فيها
او دهر عليها بيدور
معها مونه بتحميها
صلبه متل جذوع الحور
لو ما تحصن ماضيها
والغرسة مسورها بسور
وتأسس فيها وتبنيها
البلور بيبقى معريها
عصفور جناحه مكسور .
🌿🌿🌿🌿🌿🌿🌿🌿🌿
بقلمي/خضر خليفه
ليست هناك تعليقات:
إرسال تعليق